पंढरपूरची पोटनिवडणूक भाजपा लढेल ? वरिष्ठ ते स्थानिक पातळीपर्यंतची शांतता बरेच काही सांगून जाते..
पंढरपूर – पंढरपूर- मंगळवेढा विधानसभा पोटनिवडणुकीत भारतीय जनता पक्षाची भूमिका काय असणार? याकडे सार्‍यांचे लक्ष असून येथे या पक्षाला आजवर कधीही विजय मिळालेला नाही. यातच ही पोटनिवडणूक असून मतदारांची सहानभूती आमदार कै. भारत भालके यांच्या कुटुंबीयांना मिळणार हे निश्‍चित दिसत आहे. सध्या राज्यात तीन पक्षांचे महाविकास आघाडी सरकार असल्याने त्यांच्याविरोधात भाजपा पंढरपूरमध्ये लढून पराभूत झाल्यास राज्यभरात याची चर्चा होत राहणार व शिवसेनेसह काँग्रेस, राष्ट्रवादीला आयता मुद्दा मिळणार आहे. यामुळेच वरिष्ठ ते स्थानिक पातळीपर्यंत सारेच नेते शांत असावेत असे वाटते.
कै. भारत भालके यांच्या निधनाने रिक्त झालेल्या जागेसाठी पोटनिवडणूक होत असून ही जागा राष्ट्रवादीची आहे. पोटनिवडणुकीमुळे पुढील साडेतीन वर्षासाठी येथून आमदार निवडला जाईल. यापूर्वी राज्यात जेंव्हा विद्यमान आमदारांचे निधन झाले आहे तेंव्हा त्यांच्या कुटुंबात उमेदवारी दिली जाते व ते सहज विजयी होतात हा अनुभव आहे. यात अनेकदा विरोधी पक्ष देखील उमेदवार देत नाहीत असेही दिसून आले आहे. आमदार कै. भारत भालके यांनी पंढरपूर मतदारसंघाचे सलग तीनवेळा प्रतिनिधीत्व केले आहे. त्यांना 2019 मध्ये जनतेने पाच वर्षासाठी निवडून दिले होते. एकच वर्षात त्यांचे निधन झाल्याने आता पोटनिवडणूक होत आहे.
राष्ट्रवादी असो की भाजपाच्या वरिष्ठ ते स्थानिक पातळीवर सध्या पोटनिवडणुकीबाबत फारशी चर्चा होताना दिसत नाही. माध्यमांमधूनच येथील रणधुमाळीची चित्र रंगवली जात आहेत. ही निवडणूक बिनविरोध व्हावी यासाठी नक्कीच प्रयत्न येत्या काही दिवसात केले जातील यात शंका नाही. यासाठी वरिष्ठ पातळीवर चर्चा होत ही असणार ..हे स्थानिक पातळीवर समजणे कठीण आहे. यातच राष्ट्रवादीचे राज्यात काम पाहणारे उपमुख्यमंत्री अजित पवार व भाजपाचे नेते तथा माजी मुख्यमंत्री देवेंद्र फडणवीस यांच्यात सुरूवातीपासूनच चांगला ताळमेळ असल्याचे आजवर दिसून आले आहे.
