मंगळवारी शरद पवार पंढरपूर दौऱ्यावर ; पाटील, परिचारक व जाधव कुटुंबांची घेणार सांत्वनपर भेट

पंढरपूर, – गेल्या काही दिवसांत ज्येष्ठ नेते सुधाकरपंत परिचारक , राष्ट्रवादीचे कार्याध्यक्ष राजूबापू पाटील व रामदास महाराज जाधव यांचे कोरोनामुळे निधन झाले असून या तीनही सहकाऱ्यांच्या कुटुंबीयांची सांत्वनपर भेट घेण्यासाठी राष्ट्रवादी काँग्रेसचे अध्यक्ष खासदार शरद पवार हे उद्या मंगळवार 29 सप्टेंबर रोजी पंढरपूर तालुका दौऱ्यावर येत असल्याचे राष्ट्रवादीच्या वतीने सांगण्यात आले.

मागील महिन्यात राष्ट्रवादी काँग्रेस पक्षाचे जिल्हा कार्याध्यक्ष राजूबापू पाटील यांचे निधन झाले होते. भोसे येथील पाटील घराण्याशी शरद पवार यांचे अनेक वर्षांपासूनचे संबंध आहेत. कै.यशवंतभाऊ पाटील हे ही पवार यांचे कट्टर समर्थक होते. यानंतर राजूबापू पाटील यांनी देखील शरद पवार यांची साथ केली होती. मंगळवारी दुपारी बारा वाजता पवार हे पुण्याहून पंढरपूर तालुक्यातील भोसे येथे येणार असून ते पाटील कुटुंबीयांची भेट घेणार आहेत. यानंतर दुपारी एक ते दीड वाजण्याच्या सुमारास पंढरपूर शहरात त्यांचे आगमन होणार आहे.

ज्येष्ठ नेते सुधाकरपंत परिचारक यांनी काँग्रेस व राष्ट्रवादीमध्ये शरद पवार यांच्यासमवेत काम केले आहे. पवार व परिचारक घराण्याचे जिव्हाळ्याचे संबंध राहिले आहेत. मंगळवारी पवार हे पंढरपूरला आल्यावर परिचारक यांच्या निवासस्थानी जाणार आहेत. यानंतर कैकाडी महाराजांच्या मठात जावून कै. रामदास महाराज जाधव यांच्या कुटुंबाचे सांत्वन करणार आहेत. कै.रामदास महाराज जाधव यांचे नुकतेच निधन झाले आहे.

यानंतर दुपारी दोन वाजता शरद पवार हे आमदार भारत भालके यांच्या पंढरपूर शहरातील सांगोला रस्त्यावरील निवासस्थानी जाणार असून तेथून ते मोटारीने बारामतीकडे रवाना होणार आहेत.