सोलापूर जिल्हा ग्रामीणमध्ये 311 रूग्ण वाढले, एकूण बाधितांची संख्या पाच हजाराच्या पुढे

पंढरपूर, – सोलापूर जिल्ह्याच्या ग्रामीण भागात (महापालिकाक्षेत्र वगळून) कोरोनाचा प्रसार वेगाने होत असून शनिवार 8 ऑगस्ट रोजीच्या अहवालानुसार अकरा तालुक्यांमध्ये 311 रूग्ण वाढले आहेत तर 9 जणांचा मृत्यू झाला आहे. आज सर्वाधिक कोरोनाबाधित पंढरपूर तालुक्यात 115 आढळून आले आहे. गेले तीन दिवस पंढरपूर कोरोनाबाधित रूग्णांच्या आकडेवारीत अव्वल स्थानावर आहे.
यापाठोपाठ शनिवारी बार्शीत 58 तर माळशिरस तालुक्यात 31 रूग्ण आढळून आले आहेत. मागील तीन दिवसांपासून पंढरपूरमध्ये रॅपिड टेस्ट जास्त प्रमाणात होत असल्याने येथे सर्वाधिक रूग्ण सापडत आहेत. येथील कोरोनावर मात करण्यासाठी व साखळी तोडण्यासाठी प्रशासनाने सात दिवसांचा कडक लॉकडाऊन पुकारला आहे. याची सुरूवात शुक्रवारी झाली आहे
आज तालुकानिहाय पॉझिटिव्ह सापडलेले रूग्ण पुढीलप्रमाणे व कंसात आजवरचे एकूण रूग्ण – अक्कलकोट 5 (542), बार्शी 58 (1096), करमाळा 16 (217), माढा 20 (376), माळशिरस 31 (390), मंगळवेढा 1 (177), मोहोळ 18(337), उत्तर सोलापूर 14 (363), पंढरपूर 115 (866), सांगोला 20 (161) तर दक्षिण सोलापूर 13 (661).

जिल्ह्यातील एकूण कोरोनाबाधितांची संख्या 5 हजार 186 इतकी असून आजवर 153 जणांना या आजाराने प्राण गमवावे लागले आहेत. सध्या 1 हजार 786 जणांवर उपचार सुरू असून 3043 जण उपचारानंतर घरी गेले आहेत. शनिवारच्या अहवालानुसार आज 9 जणांनी कोरोनामुळे प्राण गमावले असून यात अक्कलकोट 1, बार्शी 3, मोहोळ 1,उत्तर सोलापूर 1 तर पंढरपूर 1. आज उपचारानंतर 98 जणांना घरी सोडण्यात आले.आज 3126 चाचण्या झाल्या यात 2815 अहवाल निगेटिव्ह आहेत तर 311 पॉझिटिव्ह आहेत.