भीमा नीरा खोऱ्यात पाऊस सक्रिय, चासकमान व वडिवळेवर 120 मि.मी. ची नोंद

पंढरपूर- मागील चोवीस तासात भीमा उपखोऱ्यातील चासकमान व वडिवळे या दोन्ही धरणांवर 120 मिलीमीटर इतक्या विक्रमी पावसाची नोंद आहे तर पवना प्रकल्पावर 82 व मुळशीवर 62 मि.मी. पर्जन्य नोंदले गेले आहे. याच बरोबर मुळा मुठा खोऱ्यात ही पावसाचा जोर कायम आहे. वरील धरणे भरली आहेत.
भीमा व नीरा खोऱ्यात पुन्हा पाऊस सक्रिय झाला आहे. मागील चोवीस तासात चासकमान व वडिवळे 120, भामा आसखेडा 39, आंध्रा 39, पवना 82, कासारसार्इ 31, मुळशी 62, टेमघर 55, वरसगाव 54, पानशेत 69, खडकवासला 16 मि.मी. असा पाऊस नोंदला गेला आहे. दरम्यान भीमा खोऱ्यातील धरण आता भरली आहेत. यामुळे आता तेथून मोठे विसर्ग होण्याची शक्यता आहे. चासकमान,कलमोडी, आंध्रा, कासारसार्इ, मुळशी, टेमघर, वरसगाव, पानशेत, खडकवासला हे प्रकल्प शंभर टक्के भरले आहेत. यामुळेच खडसवासला व मुळशीतून पुढे उजनीकडे पाणी सोडले जात आहे. वडीवळे 90 टक्के भरले आहे तर पवना 98 टक्के भरले आहे. घोड उपखोऱ्यात ही मागील चोवीस तासात पावसाची हजेरी लागली आहे.वडज, डिंभे, घोड हे प्रकल्प शंभरीच्या उंबरठ्यावर आहेत. दरम्यान भीमा खोऱ्यात होत असलेला पाऊस व तेथील भरलेली धरण पाहता उजनीकडे पाणी सोडले जार्इल.
नीरा खोऱ्यात पावसाचा जोर कायम असून मागील चोवीस तासात गुंजवणी 54, देवधर 57, भाटघरवर 24 मि.मी. पावसाची नोंद झाली आहे. नीरा खोऱ्यातील धरणं शंभर टक्के भरली असल्याने वीरचा विसर्ग आता वाढवून तो 23 हजार क्युसेक करण्यात आला आहे.यामुळे नीरा व पुढे भीमा नदी दुथडी भरून वाहणार आहे.