पंढरपूर -पंढरपूर विधानसभा पोटनिवडणुकीसाठी उद्या 17 एप्रिल रोजी सकाळी सात ते सायंकाळी सातवाजेपर्यंत मतदान होणार असून ही प्रक्रिया निर्भय , नि:पक्ष आणि पारदर्शक वातावरणात पार पाडण्यासाठी प्रशासकीय यंत्रणा सज्ज झाली असल्याची माहिती निवडणूक निर्णय अधिकारी गजानन गुरव यांनी दिली.
या निवडणुकीसाठी 1 लाख 78 हजार 190 पुरुष मतदार व 1 लाख 62 हजार 694 स्त्री मतदार तसेच इतर 5 असे एकूण 3 लाख 40 हजार 889 मतदार आहेत. मतदारसंघात 524 मतदान केंद्र तयार करण्यात आली असून त्यामध्ये 328 मूळ व 196 सहाय्यक मतदान केंद्र आहेत. यासाठी 524 कंट्रोल युनिट, 1048 बॅलेट युनिट व 524 व्हीहीपॅट मशीन असणार आहेत. तसेच 210 कंट्रोल युनिट, 420 बॅलेट युनिट राखीव ठेवण्यात आल्या आहेत. निवडणुकीसाठी 2 हजार 552 अधिकारी – कर्मचारी यांची नियुक्ती करण्यात आली आहे. तसेच कर्मचारी व मतदान साहित्य वाहतुकीसाठी 94 एसटी बसेस व तीन जीपची व्यवस्था करण्यात आली असल्याची माहिती गजानन गुरव यांनी दिली.
मतदारसंघातील सर्व केंद्रावर स्वच्छ पिण्याचे पाणी, पुरेसा वीज पुरवठा, शौचालय, दिव्यांगासाठी रॅमची सुविधा करण्यात आली आहे. कोरोनाच्या पार्श्‍वभूमीवर निवडणूक होत असल्याने मतदान केंद्रावर कोरोना प्रतिबंधात्मक उपाययोजनांची अंमलबजावणी करण्यात आली आहे. याच्या पार्श्‍वभूमीवर मतदान कर्मचार्‍यांचीही विशेष काळजी घेण्यात आली आहे. मतदान केंद्रावर हात धुण्यासाठी साबण, सॅनिटायझर, फेस मास्क साहित्य उपलब्ध करुन देण्यात आले आहे. तसेच प्रत्येक मतदान केंद्रावर आरोग्य पथकाची नियुक्ती करण्यात आली आहे.
